فعالان وايي اسرائیل د مرستو مادلین بېړۍ غزې ته له رسېدو راګرځولې ده

فعالان وايي اسرائیلي سرتېري هغې یوې کښتۍ ته ختلې دي چې هڅه یې کوله بشري مرستې غزې ته ورسوي. د ازادۍ د بېړۍ ائتلاف، چې دا هڅې تنظیموي، پر ټیلیګرام کې لیکلي: "له مادلین سره اړیکه پرې شوې ده."

ائتلاف یوه انځور هم خپور کړی چې ښيي خلکو د ژغورنې واسکټونه اغوستي او لاسونه یې پورته کړي دي. دا راپور تر اوسه په خپلواکه توګه نه دی تأیید شوی.

د اقلیمي بدلون مشهوره فعاله ګریتا تونبرګ هم په دې بېړۍ کې ده، چې باور کېږي دا مهال د مصر له ساحل سره نژدې ده.

د اسرائیلو د دفاع وزیر یسرائیل کاتس مخکې پوځ ته امر کړی و چې دا بېړۍ د غزې د کلابندۍ له ماتولو را وګرځوي. اسرائیل وايي دغه محاصره ځکه ضروري ده چې وسلې د حماس لاس ته ور نه شي.

رویټرز د اسرائیلو د بهرنیو چارو وزارت له قوله راپور ورکړی چې "د اسرائیلو سمندري ځواکونو دا مهال له ازادۍ د بېړۍ سره په تماس کې دي او ورته یې لارښوونه کړې چې خپل مسیر بدل کړي."

له دې مخکې له مادلین بېړۍ د خطر زنګونه پورته شوي وو، چې د احتمالي نیول کېدا خبرداری یې ورکاوه.

مادلین بېړۍ کې فعالان او د ژوند اړتیاوې بار دي او موخه یې د غزې د محاصرې ماتول دي.

پر یاده بېړۍ د بریتانیا بیرغ جګ شوی و او د فلسطینیانو ملاتړي د ازادۍ د بېړۍ ائتلاف یې اداره کوي.

فرانسوي پارلماني غړې ريما حسن، چې دا مهال د "مادلین" په بېړۍ کې ده، پر خپل انسټاګرام یوه وېډیو خپره کړې وه چې پرې لیکل شوي وو: "هغوی دلته دي". ښکاري چې دا یې د اسرائیلي ځواکونو راتګ ته اشاره وه.

همداراز، برازیلي فعال تیاګو اویلا، چې دی هم په "مادلین" بېړۍ کې دی، په خپل انسټاګرام حساب کې یو خبرداری خپور کړی او ویلي یې دي چې "بېړۍ کلابنده شوې ده".

وروسته، ائتلاف په خپل ټیلیګرام چینل کې د تیاګو اویلا یو غږیز پیغام خپور کړ، چې په کې وایي: "یو وخت ډېر څراغونه را تاو شول؛ هغوی زموږ بېړۍ محاصره کړې وه، خو په پای کې یې پخپله لاره روانه کړه".

اویلا وروسته یو ځل بیا د احتمالي برید خبرداری ورکړ او ویې ویل چې د دوی شاوخوا د اسرائیلو بې‌پیلوټه الوتکې لیدل شوې دي.

همداراز، د فلسطین د بشري حقونو لپاره د ملګرو ملتونو ځانګړې راپور ورکوونکې فرانچیسکا البانېز مخکې ویلي وو، چې پنځه چټکې اسرائیلي کښتۍ د "مادلین" بېړۍ چارچاپېره شوې دي.

هغې زیاته کړې: هغه له بېړۍ سره تماس لري او د بېړۍ کپتان خپل ټیم ته لارښوونه کوي چې ارامه کښېني، پاسپورټونه او د ژغورنې واسکټونه چمتو وساتي. هغې لیکلي: "زه اورم چې هغوی له اسرائیلي سرتېرو سره خبرې کوي... هغوی سرتېرو ته وایي چې بشري مرستې یې بار کړې او په سوله‌ییزه توګه به روانه شي."

بله خوا، د اسرائیلو د خپرونو ادارې د یوه لوړپوړي امنیتي چارواکي له خولې راپور ورکړی چې اسرائیلي پوځ نیت لري "په سوله‌ییز ډول" د مادلین بېړۍ تر خپل واک لاندې راولي، هغه د اسدود بندر ته بوځي او پکې سپاره فعالان ونیسي.

د ازادۍ د بېړۍ ائتلاف د مطبوعاتي دفتر ویاندې هې شا ویا وویل: "موږ به ونه ډار شو. نړۍ موږ ته ګوري."

هغې زیاته کړه: "مادلین یوه ملکي بې وسلې بېړۍ ده او په نړیوالو اوبو کې سفر کوي. دا له نړۍ د بشري حقونو مدافعین او بشري مرستې لېږدوي... اسرائیل هېڅ حق نه لري چې غزې ته زموږ د هڅو په لاره کې خنډ جوړ کړي."

د ائتلاف په وینا، مادلین بېړۍ یوه سمبولیکه اندازه مرستې لېږدوي، لکه وریجې او د ماشومانو شیدې (فارمولا).

په بېړۍ کې د برازیل، فرانسې، جرمني، هالنډ، اسپانیا، سویډن او ترکیې وګړي سپاره دي.

په ۲۰۱۰ کال کې، د اسرائیلو ځانګړو ځواکونو ۱۰ کسان ووژل، کله چې د "ماوي مرمره" ترکي بېړۍ ته وختل، چې د مرستو یوه کاروان یې غزې ته رهبري کاوه.

په دې وروستیو کې، اسرائیل د درې میاشتنۍ ځمکنۍ محاصرې وروسته غزې ته محدودې مرستې پرېښودې، خو دا مرستې د "غزې د بشري مرستو بنسټ" له لارې وېشل کېږي، چې د اسرائیلو او امریکا ملاتړ لري، خو ډېری بشري مؤسسې یې غندي.

د ملګرو ملتونو د بشري حقونو مشر فولکر تورک تېره اونۍ وویل فلسطینیانو ته "تر ټولو وېروونکي انتخابونه وړاندې شوي: یا دې د لوږې له امله مري، یا دې ووژل شي کله چې هڅه کوي هغه لږ خواړه تر لاسه کړي چې ورته رسول کېږي."

خو د دوشنبې په سهار، د اسرائیلو د بهرنیو چارو وزارت په ایکس (پخواني ټویټر) کې ولیکل:

"پداسې حال کې چې ګریتا تونبرګ او نورو هڅه وکړه چې یو تبلیغاتي ننداره جوړه کړي، چې موخه یې یوازې شهرت ترلاسه کول وو - او مرسته یې د یوې لارۍ له بار هم کمه وه – - په تیرو دوو اونیو کې له اسراییلو څخه غزې ته له ۱۲۰۰ څخه ډیر د مرستې لارۍ ننوتلي دي، او سربیره پردې، د غزې بشري بنسټ په مستقیم ډول په غزه کې ملکي وګړو ته نژدې ۱۱ میلیون خواړه وېشلي دي."

"غزې ته د مرستو رسولو لارې شته – خو د انسټګرام سیلفي نه دي."

نژدې ۲۰ میاشتې کېږي د ۲۰۲۳ کال د اکتوبر پر اومه پر اسرائیل د حماس د برید په غبرګون کې اسرائیلو په غزه کې پوځي عملیات پیل کړي دي.

د غزې د حماس تر کنټرول لاندې روغتیا وزارت له مخې، له هغه وخته راهیسې لږ تر لږه ۵۴٬۸۸۰ کسان په غزه کې وژل شوي دي.