Igitero cya mbere kinini cya 'drone' cyibasiye umujyi wa kabiri mu bunini wa Ukraine
- Umwanditsi, Jaroslav Lukiv na Ian Aikman
- Igikorwa, BBC News
Umukuru w'umujyi wa Kharkiv muri Ukraine avuga ko abantu nibura batatu bishwe naho abandi 21 barakomereka, mu gitero cya mbere kinini cyane cy'indege nto z'intambara zitajyamo umupilote (drone) Uburusiya bwagabye kuri uwo mujyi wa kabiri mu bunini muri Ukraine.
Meya ('Mayor') Ihor Terekhov avuga ko mu ijoro ryacyeye Uburusiya bwohereje 'drone' 48, hamwe n'ibisasu bibiri bya misile n'ibisasu bine bifite uburyo bubiyobora aho byoherejwe, bizwi nka 'gliding bombs', muri uwo mujyi wo mu majyaruguru ashyira uburasirazuba bwa Ukraine.
Icyo gitero yacyise "iterabwoba ryo ku mugaragaro". Yagize ati: "Hari ibintu byinshi byangiritse."
Meya wa Kharkiv yavuze ko inyubako 18 z'amacumbi hamwe n'ingo 13 zindi byarashweho muri uwo mujyi mu ijoro ryo ku wa gatanu. Yongeyeho ko uruhinja n'umukobwa w'imyaka 14 bari mu bakomeretse.
Minisitiri w'ububanyi n'amahanga wa Ukraine yashishikarije inshuti zayo kongera igitutu ku Burusiya no gufata "izindi ngamba zo gukomeza Ukraine kurushaho [kongerera imbaraga]", nyuma y'ibi bitero bishya by'Uburusiya.
Mbere yaho, abantu batandatu barishwe naho abandi 80 barakomereka mu bice bitandukanye byo muri Ukraine mu ijoro ryo ku wa kane rishyira ku wa gatanu, ubwo Uburusiya bwagabaga igitero cya 'drone' zirenga 400 na misile hafi 40.
Ahavuye isanamu, DSNS
Uburusiya bwavuze ko icyo gitero cyo mu kirere cyo mu ijoro ryo ku wa kane rishyira ku wa gatanu cyari icyo gusubiza ku "bikorwa by'iterabwoba by'ubutegetsi bwa Kyiv". Uburusiya bwavuze ko bwarashe ku hantu hanyuranye igisirikare gikorera.
Ibyo byabaye hashize iminsi Ukraine igabye igitero cy'ubwihanduzacumu cya 'drone' ku ndege zikomeye z'intambara z'Uburusiya ku bibuga bine by'indege za gisirikare biri imbere kure mu Burusiya.
Urwego rw'ubutasi bw'imbere mu gihugu rwa Ukraine (SBU) rwavuze ko indege nibura 40 z'Uburusiya zarashwe muri icyo gitero cyo ku cyumweru gishize cyiswe 'Operation Spider Web'.
Ukraine ivuga ko muri icyo gitero cyayo yakoresheje 'drone' 117. Zabanje koherezwa mu Burusiya mu buryo bwa magendu, nuko zishyirwa imbere mu bubiko bukoze mu giti zishyirwa inyuma ku modoka z'amakamyo, zihishwa munsi y'ibisenge bishobora gukurwaho mu buryo bw'iyakure.
Uko bigaragara, ayo makamyo yaje gutwarwa yerekezwa ahantu hanyuranye hegereye ibibuga by'indege za gisirikare by'Uburusiya, atwawe n'abashoferi bisa nkaho batari bazi imizigo batwaye. Nuko izo 'drone' zihagurutswa muri ayo makamyo mu buryo bw'iyakure.
Ubwo yaganiraga n'abanyamakuru ku wa gatanu nijoro, Perezida w'Amerika Donald Trump yavuze ko Abanya-Ukraine bahaye Perezida w'Uburusiya Vladimir Putin "impamvu yo kujyayo mu ijoro ry'ejo [iryo ku wa kane] akabamishaho ibisasu".
Uburusiya bwagabye igitero gisesuye kuri Ukraine kuva muri Gashyantare (2) mu mwaka wa 2022.
