Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
Ayavugwa mw'igura n'igurishwa ry'abakinyi: kubera iki rizoba mu biringo bibiri mu Bwongereza?
Igura n'igurishwa ry'abakinyi muri uno mwaka wa 2025 mu Bwongereza ntirisanzwe, kuko rizoba mu mice ibiri.
Ryuguruwe icese ku wa Mungu igenekerezo rya 1 Ruheshi (6) rikazohagarikwa ku wa 10 mu kiringo c'imisi itanu, ryongere risubire ryugurure ku wa 16 Ruheshi ribandanye gushika ku wa 1 Nyakanga (9).
Ibi ni mu ntumbero yo guha imirwi izokwitaba ihiganwa ry'igikombe c'isi yose rihuza imirwi (Coupe du Monde des Clubs/ Club World Cup) akaryo ko gushobora kugura abakinyi imbere y'uko ritangura.
Ishirahamwe rijejwe umupira w'amaguru kw'isi, FIFA, ryaremereye imirwi yitabira iri higanwa (Club World Cup) kwandikisha abakinyi bashasha hagati y'igenekerezo rya 1 n'irya 10 Ruheshi, be no kuva ku wa 27 Ruheshi gushika ku wa 3 Mukakaro (7) kugira bazoshobore gukina inkino z'igice co gukuranamwo (élimination directe/knockout stage).
Mw'iryo higanwa rizohuriramwo imirwi 32, ishirahamwe ry'umupira w'amaguru ku mugabane wa Bulaya, UEFA, ryahawe ibibanza 12, muri vyo hakaba harimwo Paris St-Germain (PSG) iherutse gutsindira ligue des champions/Champions League, Real Madrid, Bayern Munich na Inter Milan iherutse gutsindwa na PSG mu rukino rwabaye ku wa gatandatu w'indwi iheze.
Africa yo yahawe ibibanza bine, ikazoserukirwa n'imirwi ya Al Ahly yo mu Misiri, Wydad yo muri Maroc, Esperance de Tunis yo muri Tuniziya na Mamelodi Sundowns yo muri Afrika y'Epfo.
Mu Bwongereza Chelsea na Manchester City ni yo mirwi yo muri Premier League, ihiganwa ry'Ubwongereza, izokwitaba iri higanwa ryitezwe gutangura ku wa 14 Ruheshi muri Reta Zunze Ubumwe za Amerika.
Imirwi yose – si iyo izokwitaba iri higanwa gusa – yahawe aka karyo k'ibanze kugira ngo ishobore kugura abakinyi bashasha imbere y'uko iri higanwa ritangura.
None havugwa amaki muri iri gura n'igurishwa?
Liverpool yamaze kugura umukinyi mpuzamakungu w'Ubuholande Jeremie Frimpong w'imyaka 24 yahora akinira Bayer Leverkusen ku miriyoni 35 z'ama-euro, akaba yahawe amasezerano y'imyaka itanu. (BBC)
Umusatirizi w'umurwi Brentford Bryan Mbeumo w'imyaka 25 aripfuza kwimukira muri Manchester United, ikaba yiteze gutangura ibiganiro kugira ngo ishobore kugura uno mukinyi mpuzamakungu wa Kameruni. (Athletic)
Inter Milan irizeye kuronka nk'intizo umusatirizi wa Manchester United na Danemark Rasmus Hojlund w'imyaka 22 muri iri ci. (Gazzetta dello Sport - mu gitaliyano)
Manchester United irarindiriye ingingo izofatwa n'umukinyi wo hagati wa Portugal Bruno Fernandes w'imyaka 30, nimba yipfuza kuguma muri uno murwi canke kuwusezera, mu gihe aronderwa na Al-Hilal yo muri Arabia Sawudite. (Sky Sports)
Umusatirizi wa Crystal Palace Umufaransa Jean-Philippe Mateta w'imyaka 27, na we nyene ari ku rutonde rw'abasatirizi Manchester United irondera, ariko ishobora kuzomurwanira na Juventus hamwe na AC Milan zo mu Butaliyano. (Teamtalk)
Myles Lewis-Skelly w'imyaka 18 yiteze gutera igikumu ku masezerano mashasha muri Arsenal muri iri ci, aba ba-Gunners bakaba bashaka gukuraho ibihuha bivuga ko uno mukinyi w'inyuma w'Ubwongereza yoba ariko aronderwa na Real Madrid. (Mail)
Liverpool yemeye kugiriranira amasezerano n'umukinyi wo hagati w'Ubudagi Florian Wirtz gushika mu 2030, ariko ikaba itaremera gutanga amafaranga asabwa kuri uno mukinyi w'imyaka 22, aho Bayer Leverkusen yanse imiriyoni 130 z'ama-euro (amafaranga y'Abanyabulaya) atangwa n'uyo murwi wo mu Bwongereza, ikaba imushakako imiriyoni 150 z'ama-euro. (Bild - mu kidagi)
Barcelona yatanguye ibiganiro vy'intangamarara n'umukinyi wo ku ruhande wa Liverpool, umunya-Colombia Luis Diaz w'imyaka 28, aronderwa kandi n'imirwi yo muri Arabia Sawudite. (Florian Plettenberg)
Chelsea iriko irihweza nimba yogura umukinyi w'inyuma wa Everton Umwongereza Jarrad Branthwaite w'imyaka 22 muri iri ci, ariko ikaba ishobora kumurwanira na Tottenham. (Teamtalk)
Umukinyi wo hagati w'Umwongereza Jobe Bellingham yahisemwo kwimukira mu murwi mukuruwe Jude yahoze akinira wa Borussia Dortmund hakwimukira muri Eintracht Frankfurt na RB Leipzig, uwo murwi ukaba witeze gutangura ibiganiro na Sunderland kugira ngo ushobore kugura uno mukinyi w'imyaka 19. (Bild - mu Kidagi)
Chelsea iriko kandi irihweza nimba yogura umukinyi wo ku ruhande wa Borussia Dortmund Umwongereza Jamie Gittens w'imyaka 20 ashobora kuzogurwa imiriyoni zababa 50 z'amapawundi (amafaranga yo mu Bwongereza). (Guardian)
Manchester City iri hafi yo gushika ku masezerano n'umukinyi wo hagati wa AC Milan n'Ubuholande Tijjani Reijnders w'imyaka 26, imbere y'uko ihiganwa ry'igikombe c'isi rihuza imirwi (Fifa Club World Cup) ritegekanijwe gutangura ku wa 15 Ruheshi muri Reta Zunze Ubumwe za Amerika. (Football Italia)
Everton, Manchester United na West Ham zishobora guhurira ku musatirizi wa Serbia Aleksandar Mitrovic w'imyaka 30, mu gihe Al-Hilal iriko itegura kumwikura. (Talksport)
Brighton iguma ikurikiranira hagufi ingene ibintu bigenda ku mukinyi wo hagati wa Sheffield United Ollie Arblaster w'imyaka 21, mu gihe ariko arakira imvune yiwe yo mw'ivi. (Teamtalk)