ډونلډ ټرمپ او الن مسک له ملګرتیا تر تربګنۍ پورې
د عکس سرچینه، Getty Images
انتوني زرچر
د شمالي امریکا لپاره د بي بي سي خبریال
کله چې د نړۍ تر ټولو شتمن کس او د نړۍ تر ټولو زیات ځواکمن سیاستوال تر منځ د ټکر وضعیت رامنځته شي، نو څه به کېږي؟
نړیوال غواړي د دې پوښتنې ځواب ومومي او دا یو ښه وضعیت نه دی. نړیوال د امریکايي ولسمشر ډونلډ ټرمپ او د امریکا ټکنالوژۍ شرکت مشر الن مسک دواړو خبرو ته غوږ نیسي او اوسمهال دا دواړه کسان د یوه بل پر ضد ښکر په ښکر دي او د دوی تر منځ اختلاف تر تورونو او سپکو-سپورو پورې رسېدلی دی.
ټرمپ الن مسک ته د امریکا له فدرالي حکومت سره د ده کاروباري معاملاتو په تړاو ګواښنه کړې او دا ښاغلي مسک د سپېس اېکس پروګرام لپاره د ملا تیر حیثیت لري.
ټرمپ په دې هکله پر خپله خواله رسنۍ د ګواښ په ژبه لیکلي: ''زموږ په بودیجه کې د پیسو سپما چې میلیاردونو ډالرو ته رسېږي، دا ده چې الن مسک ته دولتي سبسډۍ او قراردادونه ختم کړل شي.''
که ټرمپ د الن مسک پر ضد دولتي دستګاه وکاروي، نو میلیاردر مسک به هرومرو سخته ضربه ویني.
همدا پرون پنجشنبه د ونډو په بازار کې د ایلن مسک د ټیسلا شرکت د ونډو بیه کې ۱۴ سلنه کموالی ولیدل شو.
خو د دوی دواړو تر منځ لفظي شخړه او ګواښنې یو لوریزې نه دي. د ټرمپ له څرګندونو وروسته مسک د ولسمشر د استیضاح غوښتنه کړې او ټرمپ ته یې ویلي، چې که له وسه یې کېږي، نو د ده شرکتونو پانګونې کې دي کمی روالي.
نوموړي زیاته کړې، د خپل ډراګن نومي راکټ پروګرام ختمولو کار یې چټک کړی. د دې پروژې له لارې امریکا خپل ستورمزلي او اړین توکي نړیوال فضايي مرکز ته استوي.
الن موسک ټرمپ ته د ځواب ورکو لپاره کافي لارې، چارې لري، چې په راتلونکي ټاکنیز کمپاین کې د سیاسي مخالفینو مالي مرسته هم پکې شامله ده.
نوموړي پر پنجشنبه وویل، ''یوه زوروره چاودنه کوي'' او له کوم ثبوت پرته یې ادعا وکړه، چې د ''جنسي مجرم جیفري اپسټین ضد هغو دوسیو کې چې برالا شوې نه دي، د ټرمپ نوم هم شامل دی.''
خو د امریکا ولسشمرۍ مطبوعاتي دفتر سکرترې کارولین لیوټ بیا د ښاغلي مسک دې تورونو په ځواب کې لنډې خبرې کړې.
نوموړې وايي: ''دا د الن مسک خورا ناوړه فعل دی. دی د یوه خورا شاندارې پالیسۍ له کبله ځکه ناخوښ دی، چې د ده د خوښې خبرې پکې شاملې نه دي.''
مسک ښايي د ټرمپ ټول حکومت پر ضد دا جګړه و نه شي ګټلای، خو دی ټرمپ او رپیبلکن ګوند ته یو زورور ټکان ورکولای شي.
ټرمپ په دې پوهېږي او همدې ته په پام یې پرون په سپینه ماڼۍ کې د لفظې شخړې تاو کمولو لپاره د پولیسو ستاینې په غونډه کې برالا د مسک په هکله له خبرو ډډه وکړه.
خو پر خپله ټروتھ خواله رسنۍ یې بیا یوه پیغام کې ولیکل چې که مسک د ده پر ضد وي، دی پرې ''هېڅ اعتراض نه لري'' خو په وینا یې هیله یې دا ده، چې هغه څو میاشتې مخکې دولتي دنده پرې ایښې وای.
له دې وروسته هغه د مالیې او لګښتونو په د خپلې ''ستر او شاندار'' قانون جوړونې په هکله غږېدلی دی.
خو له دې هر څه سره سره داسې نه ښکاري، چې د دواړو ترمنځ د پنجشنبې ورځې توندې او ترخې خبرې به په اسانۍ سره سمې شي.
