Ayavugwa mu mupira w’amaguru: Xavi ashobora kugondozwa akaguma amenyereza Barcelona

Manchester City yoba iriko irakorera ku cipfuzo c’umukinyi wo hagati wa Brezili Lucas Paqueta w’imyaka 26 co kuva muri West Ham mu ci - ariko yomurondera mu gihe itohoza ririko rimukorwako n’ishirahamwe ry’umupira w’amaguru ry’Ubwongereza, Football Association, ku bijanye no kurenga amategeko ajanye no gutigira ryoramuka rihebwe. (Guardian)

Amasezerano afitaniye na West Ham akaba avuga ko umurwi wokenera Paqueta wotegerezwa gutanga imiriyoni 85 z’amapawundi azotangura kuja mu ngiro mu kwa gatandatu, kandi Manchester City yiteze ko bitazoyigora gushika ku mwumvikano n’uno mukinyi. (Athletic)

City iriteguye gutanga imiriyoni 120 z’amapawundi ku musatirizi w’Ubudagi Jamal Musiala w’imyaka 21 asanzwe akinira Bayern Munich. (TeamTalk)

Liverpool iriko irategura kurondera umusatirizi wa Sporting Lisbon Umwongereza Marcus Edwards w’imyaka 25, hamwe n’umukinyi w’inyuma wa Portugal Goncalo Inacio w’imyaka 22 mu ci riza. (Football Insider)

Umusatirizi wa Paraguay Miguel Almiron w’imyaka 30 be n’umusatirizi w’Umwongereza Callum Wilson w’imyaka 32, ni bamwe mu bakinyi bashobora kuva muri Newcastle United mu gihe uno murwi uriko witegurira inagurwa mu ci riza. (Telegraph)

Manchester United na Tottenham zegereye umukinyi w’inyuma wa Fulham Umwongereza Tosin Adarabioyo w’imyaka 26 kugira ngo zirabe ko zoshika ku masezerano y’intangamarara yoganisha ku masezerano nyayo. (TeamTalk)

Umukinyi w’inyuma wa Manchester United Umwongereza Aaron Wan-Bissaka w’imyaka 26 ariko araronderwa na Inter Milan ku miriyoni 13 z’amapawundi mu gihe amasezerano afitaniye na United azorangira mu ci rya 2025. (Gazetta dello Sport – mu gitaliyano)

Tottenham irizeye ko izoshika ku masezerano idatevye n’umukinyi wo hagati wa Chelsea Umwongereza Conor Gallagher w’imyaka 24, mu gihe igihe c’igura n’igurishwa ry’abakinyi kizoba cuguruye. (Sun)

Umukinyi w’inyuma wa Barcelona Pau Cubarsi w’imyaka 17 yipfuza gutera igikumu ku masezerano mashasha i Camp Nou nubwo ariko aronderwa n’imirwi ikomakomeye y’i Bulaya inyuma y’aho yerekaniye ubuhinga mu rukino na Paris St-Germain. (Mundo Deportivo – muki-espagnol)

Arsenal na Liverpool zahambije Bayern Munich mu rugamba rwo kurondera umukinyi w’inyuma wa Espagne Alejandro Grimaldo w’imyaka 28 asanzwe akinira Bayer Leverkusen. (Football Transfers)

Umukinyi w’inyuma wa Juventus umunya-Brezili Gleison Bremer w’imyaka 27 asanzwe ariko aronderwa na Manchester United, afise ikigabane mu masezerano yiwe kimwemerera kuva mu murwi wiwe mu ci rya 2025 ku miriyoni 60 z’ama-euro. (Gazzetta dello Sport – mu gitaliyano)

Imirwi itari mike yo muri Premier League (ihiganwa ry’Ubwongereza) n’i Bulaya iripfuza kugura umusatirizi wa Manchester United Umwongereza Mason Greenwood w’imyaka 22 asanzwe yaratijijwe muri Getafe. (Mail)

Umumenyereza wa Brentford Thomas Frank yamirira kure amakuru avuga ko umusatirizi w’Umwongereza Ivan Toney w’imyaka 28 ashobora kuva muri uno murwi ku mahera ari musi y’imiriyoni 30 z’amapawundi mu ci riza. (Evening Standard)

Umukinyi wo hagati wa Luton Town Umwongereza Ross Barkley avuga ko adashobora kuvuga kuri kazoza kiwe imbere y’uko uno mwaka w’inkino urangira, ni mu gihe Manchester United iriko imuraba ryiza. (Express)

Mu gihe umusatirizi karuhariwe Kylian Mbappe yiteze kuva muri Paris St-Germain akimukira muri Real Madrid, uwo murwi wo mu Bufaransa uriko urakurikiranira hagufi umusatirizi w’Umufaransa Marcus Thuram w’imyaka 26 asanzwe akinira Inter Milan. (Tuttosport, iciye kuri Bild – mu kidagi)

Umumenyereza wa Barcelona Xavi ashobora kugondozwa akaguma muri uno murwi inyuma y’aho atangarije ko azosezera mu mpera z’uno mwaka w’inkino – ariko ni mu gihe bokwemera kumushigikira bakamuha uburyo yokoresha mu gihe c’igura n’igurishwa ry’abakinyi. (Mundo Deportivo – mu ki-espagnol)

Umumenyereza wa Manchester United Erik ten Hag yemeje ko umukinyi w’inyuma Umwongereza Harry Maguire w’imyaka 31 yipfuza kuronswa umwanya wo kwama akina, ni mu gihe West Ham iriko imuraba ryiza. (Metro)