Ayavugwa mw’igura n’igurishwa ry’abakinyi: Kimmich, Martial, Greenwood, Godfrey, Onana, Lukaku

Liverpool yahambije Manchester City mu rugamba rwo kurondera Umudagi akina hagati Joshua Kimmich w’imyaka 28 asanzwe akinira Bayern Munich. (Bild – mu kidagi)

Manchester United nta mugambi ifise wo kurondera uwusubirira umusatirizi w’Umufaransa Anthony Martial w’imyaka 28, yiteze kumara amezi cumi atinjiye mu kibuga inyuma yo kubagwa mw’itako. (Mail)

Imvune ya Martial yahagaritse umugambi wa Manchester United wo kumugurisha muri kino gihe c’igura n’igurishwa ry’abakinyi. (Times)

Manchester United yiteze kwegeranya imiriyoni 100 z’amapawundi izokura mw’igurishwa ry’abakinyi mu ci riza, ihereye ku musatirizi wayo, umwongereza Mason Greenwood w’imyaka 22 yatijijwe muri Getafe. (i Sport)

Bayern Munich yahagaritse ivyo kurondera umukinyi w’inyuma ku ruhande rw’i buryo wa Newcastle United umwongereza Kieran Trippier w’imyaka 33. (ESPN)

Umukinyi wo hagati wa Newcastle Miguel Almiron ariko araronderwa n’umurwi Al-Shabab wo muri Arabia Sawudite, ariko uno mukinyi w’imyaka 29 yamuka muri Paraguay yabwiye umurwi wiwe w’aba-Magpies ko adashaka kugenda. (Mail)

Chelsea iriko iraraba ko yorondera umusatirizi wa Aston Villa umunya-Colombia Jhon Durán w’imyaka 20, asanzwe kandi aronderwa na West Ham. (Telegraph)

Chelsea yashinze igiciro c’imiriyoni 38 z’amapawundi ku musatirizi wayo Umubirigi Romelu Lukaku w’imyaka 30 yatijijwe mu murwi Roma mu Butaliyano.(Calciomercato – mu gitaliyano)

Brentford yemeye ko ishobora gutanga imiriyoni 2.6 z’amapawundi ku munyegori Hakon Valdimarsson w’imyaka 22 asanzwe akinira umurwi Elfsborg wo muri Suwede. (Athletic)

Umurwi Genoa wo mw’ihiganwa Serie A ryo mu Butaliyano uripfuza umukinyi w’inyuma wa Everton Umwongereza Ben Godfrey w’imyaka 26. (Fabrizio Romano)

Everton iriteguye kandi kugurisha muri uku kwezi umukinyi wayo wo hagati Amadou Onana w’imyaka 22 ku miriyoni 60 z’amapawundi, Newcastle ikaba imwipfuza. (Football Transfers)

Luton Town iripfuza umukinyi wo hagati wa Coventry City, Umwongereza Ben Sheaf w’imyaka 25. (Teamtalk)

Fulham yavuye mu biganiro na Krasnodar vyo kurondera umusatirizi wa Colombia Jhon Cordoba w’imyaka 30, kubera bivugwa ko yoba ariko aronderwa n’umurwi wo mu Burusiya. (Football Transfers)

Umunyegori wa Newcastle Umunya-Slovakia Martin Dubravka w’imyaka 35 ariko ariga ku bijanye na kazoza kiwe muri uno murwi mu ci riza. (i Sport)

Arsenal iriko irarondera ingene yoronka umukinyi wo hagati wa Paris-St Germain umunyaholande Xavi Simons w’imyaka 20, asanzwe yatijijwe muri RB Leipzig, mu gihe vyokwanka ko ironka umusatirizi wa Wolves umunya-Portugal Pedro Neto w’imyaka 23. (Football Transfers)

Amasezerano y’umukinyi wo hagati wa Coventry City Umwongereza Callum O'Hare w’imyaka 25 azohera mu ci riza akaba ariko arakurikiranirwa hagufi na Southampton, Burnley na Leicester City. (Mail)