Umugambi wa Trump kuri Gaza ntuzoba, ariko uzogira ingaruka: umwihwezo wa Jeremy Bowen

Umugambi wa Donald Trump w'uko Reta Zunze Ubumwe za Amerika ''zizokwigarurira Gaza'' hanyuma ''zikaganza'' Gaza, mu kubikora zikimura abahaba, ntuzoba. Ukeneye ko ibihugu vy'Abarabu biwushigikira none vyarawiyamirije.

Birimwo Jordaniya na Misiri - ibihugu Trump ashaka ko vyakira abanya-Gaza - na Arabia Saudite, yo ishobora kwitegwa kuriha amafaranga vyosaba.

Ibihugu vya Buraya bicuditse na Amerika na Israel navyo ntivyerekwa ico ciyumviro.

Bamwe - kumbure benshi - mu banya-Palestina muri Gaza bashobora kwifuza kuhava hamwe boronka ayo mahirwe.

Ariko n'aho umuriyoni bogenda, abashika miriyoni 1.2 boba bakiri ngaho.

Bishoboka ko Reta Zunze Ubumwe za Amerika, yo izoba yabaye nyene ico Trump yita "Riviera of the Middle East" - vyoba ngombwa ko ikoresha inguvu kugira ihabavane.

Inyuma y'aho Amerika igiriye muri Irak mu 2003 bikarangira bibaye akaga, uwo mugambi ntuzokundwa na gato muri Reta Zunze Ubumwe za Amerika.

Yoba ari amaherezo y'icizere coba cari kikihari ko inyishu iciye ku bihugu bibiri ishoboka. Nico cifuzo muri ayo matati amaze imyaka irenga ijana c'uko yoshobora kurangira hashinzwe igihugu ca Paletina cigenga iruhande ya Israel.

Reta ya Netanyahu ntiyerekwa ico ciyumviro, none inyuma y'imyaka y'ibiganiro ataco bishikako, ''ibihugu bibiri'' cacitse icivugo giherera mu majambo gusa.

Ariko nico poritike yo hanze Amerika yagenderako kuva mu myaka ya 1990.

Umugambi wa Trump kandi woba uhonyanze amategeko mpuzamakungu.

Ivy'uko Amerika yemeza ko ishigikiye itunganywa ry'ibihuza amakungu rihagaze ku mategeko vyari bisanzwe bitagishemeye, uwo mugambi wo woba uje kubidendura. Amero y'Uburusiya yo kwigarurira ubutaka kuri Ukraine hamwe n'Ubushinwa kuri Taiwan yoba asukiwe mu coze.

Bizoba bivuze iki ku karere?

None kuki bitumena umutwe niba bitazoba - nibura atari mu nzira Trump yatangarije i Washington, Benjamin Netanyahu araba amwemenyura n'irya muzitsa rikaboneka, bigaragara ko aryohewe?

Inyishu ni uko, ivyo Trump yavuze, n'aho ari amagambure, bizogira ingaruka.

Ni perezida wa Reta Zunze Ubumwe za Amerika, umugabo wa mbere akome cane kw'isi - atakiri wa wundi aja ku mboneshakure kwiyerekana canke umunyaporitike akeneye kuvugwa cane mu binyamakuru.

Ku kiringo kigufi, inkuruma yatewe n'ayo majambo yiwe y'akumiro ishobora gutuma amasezerano yo guhagarika intambara muri Gaza arushiriza kugoyagoya. Rimwe mu masoko yanje mu Barabu yambariye ati ishobora kuba ''inzamba yayo y'urupfu''.

Kuba ata nteguro ya kazoza k'ubutegetsi bwa Gaza ihari bisanzwe ari agahaze muri ayo masezerano.

Ubu noneho Trump aragize iyo atanga, kandi n'ubwo itoja mu ngiro, ikoze ahakomeye mu mitima y'abanye-Palestina n'Abanya-Israel.

Bizoha inkigi imigambi n'indoto vy'Abayahudi ata na kimwe berekwa atari inyungu zabo bafata ko ubutaka bwose buri hagati y'ikiyaga Mediterranee n'uruzi rwa Yorodani, kumbure no kurenga ngaho, ari ubwo Abayahudi bahawe n'Imana.

Indongozi zabo ziri mu bagize reta ya Netanyahu kandi nibo bamugumije ku butegetsi - kandi bararyohewe. Bashaka intambara ya Gaza gusubira kuvyuka ku ntego y'igihe kirekire yo kuhavana Abanya-Palestina hagasubira Abayahudi.

Umushikiranganji ajejwe ikigega Bezalel Smotrich yavuze ko Trump yatanze inyishu kuri kazoza ka Gaza k'inyuma y'ibitero vyo ku wa 7 Gitugutu.

Itangazo ryiwe ryavuga ko ''uwo ari we wese yagize ubwicanyi bwa mbere bw'agahomerabunwa ku butaka bwacu azokwisanga yatakaje ubwiwe burundu. Ubu tugiye gukora kugira noneho duhambe burundu, Imana idufashije, iciyumviro kibangamye c'igihugu c'Abanya-Palestina.''

Indongozi z'ivyiyumviro vya politike vyo hagati na hagati muri Israel bo nta majambo menshi bavuze mu gushima uwo mugambi wa Trump, kumbure kubera ugutinya ibishobora kuba, ariko bawakiriye neza mu rupfasoni.

Hamas n'imigwi y'Abanya-Pelestina yitwaje ibigwanisho bashobora kwumva ko bikenewe ko bokwishura Trump babicishije mu kwerekana inguvu kuri Israel.

Ku banya-Palestina, amatati na Israel ashingiye ku kunyagwa [ubutaka] n'ukwibuka ico bita al-Nakba, ''akaga''. Uko kwari ugushwiragira kw'Abanya-Palestina igihe Israel yatsinda intambara yo kwikukira mu 1948.

Abanya-Palestina barenga 700.000 barahunze canke barakurwa mu ngo zabo n'ingabo za Israel. Bose kiretse abari ku rushi ntibegeze basubira kwemererwa gusubirayo, hanyuma Israel ica ishiraho amategeko n'ubu igikoresha yo kunyaga aho bahora baba.

Ubu ubwoba ni uko bigira bisubire kuba.

Abanya-Palestina benshi basanzwe babona ko Israel yariko irakoresha intambara yo kurwanya Hamas mu gusambura Gaza no kwirukana abahaba.

Biri mu bigize ikirego c'abo ko Israel iriko irakora ihonyabwoko - none ubu bashobora gufata ko Trump yongereje inguvu ziwe mu migambi ya Israel.

Ni iki coba catumye Trump avuga gutyo?

Kubera Trump yagize ico avuga, si co gituma kiba ukuri canke ko ata nkeka wokigirako.

Ivyo avuga rimwe na rimwe umenga ni uwitaza mu kwese mw'isoko ryo kugura inzu kuruta kuba ari porike ya Amerika imaze kwemezwa.

Kumbure Trump ariko arasamaza abantu mu gihe ariko arategura uwundi mugambi. Bivugwa ko anyotewe cane guhabwa agashimwe k'amahoro kitiriwe Nobel.

Abafishije kurondera amahoro mu karere k'uburasirazuba bwo hagati, n'aho amaherezo boba batabishitseko, barakunda kugatsindira.

Igihe isi yari ikiriko iranoganza ivyo yavuze kuri Gaza, yaciye yandika ku rubuga rwiwe rwa Truth Social icufuzo ciwe ''c'amasezerano y'amahoro yahinyujwe'' ku kibazo ca nikeyeri na Iran.

Reta ya Iran irahakana ko ata bigwanisho vya nikereyeri ishaka ariko vyarahaririweko ku mugaragaro muri reta ya Iran niba ubu bageremiwe cane gushika aho bakenera [ikigwanisho] ca rutura co gutururuza.

Netanyahu amaze imyaka nyinshi ashaka ko Amerika, ifashijwe na Israel, isambura ibibanza vya nikereyeri vya Iran. Kugirana amasezerano na Iran ntivyigeze biba umugambi wiwe.

Mu kiringo ca mbere ca Trump, Netanyahu ntaco atakoze ngo amwumvishe kuvana Amerika mu masezerano Barack Obama yari yasinye na Iran.

Niba Trump yashaka guha intagondwa z'abanya-Israel icotuma zinezerwa mu gihe ariko ararondera kuvugana na Iran, yabishitseko.

Ariko yatumye kandi haba amadidane kandi hongerekana uruhagarara mu gice c'isi ca mbere mu kudatekana.