Putin agabisha ko atazokwigera na gato yemerera Ukraine gutunga ibirwanisho vy'ubumara

Perezida Vladimir Putin w'Uburusiya aragabisha ko adashobora namba kwemerera Ukraine ko ironka ibirwanisho ruhonyanganda vy’ubumara.

Igihe yishura ikibazo c’ukungene Uburusiya bwokwifata mu gihe Ukraine yoba ironse ibi birwanisho, Putin yishuye ko adashobora kuvyihanganira, kandi ko ari nka hamwe vyoramuka binashitse Uburusiya bwoca bukoresha ibirwanisho vyose ruhonyanganda bufise, nk’uko itororokanirizo ry’amakuru rya reta y’Uburusiya RIA ribivuga.

Ibi vyari bifatiye ku nkuru y’ikinyamakuru New York Times co muri Amerika mu ndwi iheze, aho cavuze ko umutegetsi atavuzwe izina yasavye ko Ukraine ikwiye guhabwa ibirwanisho ruhonyanganda vy’ubumara imbere y’uko Perezida Joe Biden ava ku butegetsi muri Nzero (1) umwaka uza.

Ikinyamakuru Interfax casubiyemwo amajambo ya Putin, aho avuga ati: "Wewe wibaza iki, ugerageje kwiyumvira, mu gihe igihugu gisanzwe kiri mu ntambara coramuka gihawe ibirwanisho ruhonyanganda vy’ubumara, wibaza ko twoca dukora iki?

“Biramutse bishitse, twovyakira hanyuma tugaca dukoresha ibirwanisho vyose – ndasubiramwo – vyose ruhonyanganda Uburusiya bufise. Vyose. Ico ntidushobora kucihanganira”.

Zelensky yama yidoga ko amasezerano ya Budapest yo mu 1994, yatumye Ukraine isubiza ibirwanisho ruhonyanganda yari yarazwe n’icahoze ari Reta Zunze Ubumwe z’Abasoviyeti (URSS/USSR) yatumye igihugu gisigara ata mutekano ukwiye gifise.

Ariko, Ukraine irahakana ko ata mugambi ifise wo guhingura ibirwanisho ruhonyanganda vy’ubumara mbere n’abahinga bakaba babona ko idashobora kubihingura ningoga na ningoga ubu bwa vuba nubwo yoba ibishatse.

Uburusiya ntiburakoresha ibirwanisho ruhonyanganda mu gutera Ukraine, nubwo Ukraine iguma yagiriza ico gihugu ko cabikoresheje, ariko bikaba ata kindi gihugu kiragiriza Uburusiya.

Umukuru w’igisata ca Amerika kijejwe igendereza ryo hanze CIA, Bill Burns, avuga ko we ubwiwe yagabishije Uburusiya ko butohirahira ngo bukoreshe ibirwanisho ruhonyanganda vy’ubumara, igihe kuri we yabona ko bwashobora kubikoresha.

Hagati aho, Putin aragabisha ko ashobora gutera ibigo bifata ingingo vya Ukraine akoresheje ikindi gisasu ca misire co mu bwoko bwa Oreshnik gishobora kwikorera umutwe w’ibiturika vy’ubumara, nubwo amenyesha ko ata mugambi afise wo gukoresha ibisasu vy’ubumara.

Ni mw’ijambo yashikirije amasaha makeyi inyuma y’aho Uburusiya bukoreye igitero rutura ku masoko ntanganguvu ya Ukraine mw’ijoro ry’ejo, mu vyo yise inyishu ku “bitero bibandanya” hakoreshejwe ibisasu vya misile vya Atacms vyatanzwe na Amerika ku butaka bw’Uburusiya.

Perezida Volodymyr Zelensky wa Ukraine agabisha ko “iterabwoba ry’Uburusiya” iryo ari ryo ryose rizokwishurwa ku rugero nyarwo.

Mu ndwi iheze, Ukraine yararashe ku butaka bw’Uburusiya ikoresheje ibisasu vya Atacms hamwe n’ivya Storm Shadow yahawe n’Ubwongereza ku ncuro ya mbere kuva intambara yadutse muri Ruhuhuma 2022, inyuma y’aho iherewe uruhusha na Amerika, Ubwongereza n’Ubufaransa.

Igitero c’Uburusiya co mw’ijoro ry’ejo camaze amasaha atari make hakoreshejwe indege zitagira abadereva n’ibisasu vya misire vy’urutavanako mu kirere cose ca Ukraine, igitero cari kigize kabiri c’ubu bwoko mu kwezi kumwe.

Nta bapfuye canke ngo bakomereke, ariko catumye abantu barenga umuriyoni muri Ukraine babura umuyagankuba.

Zelensky avuga ko Uburusiya bwakoresheje ibisasu bitekeye utundi dusasu (cluster munitions/ armes à sous-munitions) ku bibanza vya gisivire.

Putin avuga ko iki gitero cakoresheje ibisasu vya misire 90 hamwe n’amadrone 100, kandi ko harimwo na Oreshnik, ubwoko bw’igisasu ca misire kiraswa kure kandi, nk’uko Putin abivuga, kidashobora kuzibirwa.

Abategetsi ba Amerika babona ko Uburusiya bushobora kuba bufise igitigiri gito c’ibisasu vya Oreshnik biriko birageragezwa, kandi ko bwokenera umwanya kugira ngo buhingure ibindi.

Mw’ijambo asanzwe ashikiriza buri joro, Zelensky yaraye avuze ko Putin ata "mugambi afise wo kurangiza iyi ntambara" kandi ko arondera "kubuza abandi kuyirangiza".

Ati: "Uku kubandanya yunyura ibintu muri iki gihe ni uburyo bwo gutera igitsure mu ntumbero yo guhatira umukuru w’igihugu ca Reta Zunze Ubumwe za Amerika kwemera ivyo Uburusiya busaba".

Ico gitero c’Uburusiya cateje ibiturika mu bisagara bitari bike, harimwo Odesa, Kharkiv na Lutsk.

N’umugwa mukuri Kyiv waratewe, ariko abategetsi ba Ukraine bavuga ko ibisasu vyose vya misire vyarashwe ku mugwa mukuru vyasamiwe mu kirere. Umukuru w’ubutegetsi bwa gisirikare i Kyiv avuga ko ico gitero camaze hafi amasaha icenda n’igice.

Uturere nibura 12 mu gihugu cose ca Ukraine, harimwo intara zitatu zo mu burengero, ni two twatewe, mbere umushikiranganji w’amasoko ntanganguvu Herman Halushchenko avuga ko hafashwe ingingo yo gushiraho ikirangamisi co gutanga umuyagankuba.